Në datat 15 dhe 16 maj, Tirana do të mirëpresë Samitin e Komunitetit Politik Evropian, me pjesëmarrjen e liderëve nga e gjithë Evropa. Për shkak të ngjarjes, do të ketë masa të shtuara sigurie, bllokime rrugësh dhe trafik të rënduar në Tiranë dhe zonat përreth.
Pasagjerët që udhëtojnë nga Aeroporti Ndërkombëtar i Tiranës këshillohen të nisen 3 deri në 4 orë përpara fluturimit. Rekomandohet kontrollimi i rregullt i njoftimeve nga linjat ajrore. Sugjerohet gjithashtu të bëhet check-in online dhe karta e imbarkimit të ruhet në telefon.
Në aeroport mund të ketë kontrolle shtesë sigurie, ndaj bashkëpunimi i udhëtarëve është i domosdoshëm.
Policia e Shtetit ka njoftuar akset e mëposhtme për akses në aeroport gjatë datave 15–16 maj: rrugët dytësore të autostradës “Tiranë–Qafë Kashar–Rinas”, Unaza Veriore, degëzimi “Paskuqan–Institut–Kamëz–Domje–Laknas–Rinas” dhe degëzimi “Paskuqan–Institut–Kamëz–Valias–Rinas”.
Aeroporti Ndërkombëtar i Tiranës mbetet në gatishmëri të plotë për të garantuar një përvojë udhëtimi sa më të sigurt dhe të organizuar për të gjithë pasagjerët.
Lexo më shumë
👇
