Kontrolli i Lartë i Shtetit përfundon auditimin e doganës së Rinasit, ndërsa rezulton se aty trau në favor të shtetit nuk ekziston për abuzuesit. Sipas raportit të siguruar nga weblajm.com rezulton se me mallrat që është abuzuar dhe toleruar më shumë duke shkaktuar dëm ekonomik për të cilin sipas KLSH-së në dijeni është edhe Drejtoria e Përgjithshme e Doganave janë pajisjet mjekësore si dhe telefonat celularë.
Shkelje të rënda dhe abuzime me të ardhurat doganore janë konstatuar në Doganën e Rinasit, sipas raportit të fundit të Kontrollit të Lartë të Shtetit. Auditimi ka zbuluar një sërë parregullsish në vlerësimin e mallrave, zbatimin e TVSH-së, procedurat doganore dhe administrimin financiar, të cilat kanë sjellë humbje të konsiderueshme për buxhetin e shtetit.
- Përjashtime të pajustifikuara nga TVSH për pajisje mjekësore
Gjatë viteve 2023 dhe 2024 janë evidentuar 12 raste ku pajisje mjekësore janë përjashtuar në mënyrë të pajustifikuar nga TVSH-ja në import. Mungesa e kontrolleve dokumentare dhe fizike ka sjellë të ardhura të munguara në vlerën 34,863,712 lekë. Gjithashtu, nuk janë aplikuar gjoba për agjencitë doganore, në një total prej 600,000 lekësh. - Vlerësime të gabuara për smartphonë të importuar
Për periudhën 2023–2024 janë evidentuar 39 raste në të cilat janë bërë vlerësime të gabuara për smartphonë me kod tarifor 85171300, duke mos respektuar metodat dhe dokumentacionin përkatës. Si rezultat, janë llogaritur 9,043,218 lekë të ardhura të munguara për shtetin. - Mospërfshirja e mallrave me skonto në vlerën doganore
Në deklaratat doganore për mallra të kapitullit 12 janë konstatuar 13 raste me mangësi, ku nuk janë përfshirë zbritjet (skontot) në vlerën e deklaruar, duke shkelur Kodin Doganor. Humbjet për buxhetin kapin vlerën 2,466,666 lekë. - Klasifikime të gabuara dhe penalitete të paaplikuara
Në 6 raste janë konstatuar shkelje të klasifikuara gabimisht dhe janë vendosur penalitete jo në përputhje me nenet përkatëse të Kodit Doganor. Kjo ka rezultuar në mungesë penalitetesh në shumën 272,212 lekë. - Mungesë transparence dhe dokumentacioni në procesverbalet e shkeljeve
Procesverbalet e hartuar nga dogana për shkeljet nuk përmbajnë referenca të qarta për nenet e shkelura, sanksionet dhe dokumentimin e njoftimeve për palët. Këto mangësi bien ndesh me nenet 273–276 të Kodit Doganor. - Parregullsi në zbatimin e Regjimit të Përpunimit Aktiv
Në këtë regjim janë evidentuar mospërputhje si mungesa e kontrolleve fizike apo dokumentare, dosje të paplota dhe mungesë e akteve rakorduese. Këto cënojnë mbikëqyrjen efektive dhe bien në kundërshtim me udhëzimin nr. 4, datë 28.09.2018. - Moszbatim i procedurave për Magazinimin e Përkohshëm
Dega e Rinasit nuk ka kryer kontrollet periodike tremujore dhe nuk ka trajtuar siç duhet mallrat që kishin kaluar afatin 90-ditor të magazinimit. Këto veprime janë në shkelje të drejtpërdrejtë të dispozitave përkatëse të Kodit Doganor. - Diferencë e madhe në llogarinë “Debitorë të ndryshëm”
Në fund të vitit 2022, u konstatua një mospërputhje e madhe mes regjistrimeve kontabël dhe të dhënave të sektorit të borxhit, me një diferencë prej 81,464,557 lekësh. Kjo shkelje bie ndesh me udhëzimet e Ministrisë së Financave për pasqyrat financiare dhe rrit rrezikun për keqmenaxhim të fondeve publike.
