Presidenti i Republikës së Italisë ka dekoruar me titullin e lartë “Kalorës i Urdhrit të Yllit të Italisë” Drejtorin e Departamentit të Policisë Kriminale, Neritan Nallbati, dhe Drejtorin e Drejtorisë së Antiterrorit, Alban Dautaj. Ceremonia u zhvillua në ambientet e Ambasadës Italiane në Tiranë, ku titujt u dorëzuan nga Ambasadori Marco Alberti, në prani të figurave të larta të shtetit shqiptar, përfshirë Presidentin Bajram Begaj dhe Zëvendësministrin e Brendshëm Besfort Lamallari.
Dekoratat përbëjnë një vlerësim të lartë për kontributin e strukturave të Policisë së Shtetit në forcimin e bashkëpunimit mes dy vendeve dhe luftën kundër krimit të organizuar dhe terrorizmit. Z. Nallbati u nderua për rolin e tij vendimtar në krijimin e skuadrave të përbashkëta hetimore dhe arrestimin e të kërkuarve nga drejtësia italiane, ndërsa z. Dautaj për punën e tij në konsolidimin e marrëdhënieve të sigurisë dhe krijimin e grupit trepalësh “Skënderbeg”.
Në fjalët e tyre të ndjera gjatë ceremonisë, të dy drejtuesit falënderuan autoritetet italiane dhe Policinë e Shtetit për mbështetjen, duke theksuar rëndësinë e bashkëpunimit të ngushtë ndërinstitucional. Policia e Shtetit nënvizon angazhimin për të vijuar këtë partneritet strategjik, në funksion të sigurisë së përbashkët dhe luftës së përbashkët kundër kriminalitetit ndërkombëtar.
Presidenti i Republikës së Italisë dekoron me titullin “Kalorës i Urdhrit të Yllit të Italisë”, Drejtorin e Departamentit të Policisë Kriminale dhe Drejtorin e Drejtorisë së Antiterrorit.
Ceremonia e nderimit u zhvillua në ambientet e Ambasadës së Italisë dhe titujt e akorduar iu dorëzuan Drejtues i Lartë Neritan Nallbatit dhe Drejtues Alban Dautajt, nga Ambasadori i Italisë në Shqipëri, Sh. T. Z. Marco Alberti. Në ceremoni morën pjesë dhe Presidenti i Republikës së Shqipërisë, z. Bajram Begaj, Zëvendësministri i Brendshëm, z. Besfort Lamallari, Drejtori i Përgjithshëm i Policisë së Shtetit Drejtues Madhor Ilir Proda, Rektori i Universitetit të Tiranës, z. Artan Hoxha, si dhe Prokurori i SPAK, z. Adnan Xholi.
Titujt, vlerësim i lartë për kontributin që kanë dhënë strukturat respektive të Policisë së Shtetit, në marrëdhëniet policore bilaterale dhe në luftën kundër krimit të organizuar.
Konkretisht, z. Nallbati u vlerësua për kontributin e tij vendimtar në forcimin e marrëdhënieve mes Italisë dhe Shqipërisë, përmes veprimtarive të përbashkëta operative, krijimit të skuadrave të përbashkëta hetimore dhe ndalimit të shtetasve të rrezikshëm, në kërkim nga drejtësia italiane.
Z. Dautaj u vlerësua me motivacionin, bashkëpunim i përditshëm me Policisë italiane, kontribut në luftën kundër terrorizmit ndërkombëtar dhe krijim të grupit trepalësh “Skënderbeg” (ndërmjet Shqipërisë, Italisë dhe Kosovës, kundër terrorizmit ndërkombëtar). Gjithashtu, z. Dautaj është pikë referimi për çështjet e sigurisë dhe ka ndihmuar në konsolidimin e marrëdhënieve dypalëshe.
Gjatë fjalës së mbajtur në ceremoni, Ambasadori Alberti u shpreh: “Puna e përbashkët midis Policisë italiane dhe asaj shqiptare është një nga arsyet kryesore që forcon bashkëpunimin mes dy vendeve tona. Dy drejtuesit që sot marrin dekoratën janë elemente shumë të rëndësishme të Policisë së Shtetit shqiptar, si dhe përfaqësues të çmuar të bashkëpunimit me Italinë. Është një nder i veçantë që t’iu dorëzojmë sot, këto dekorata.”
Gjatë fjalës së mbajtur me rastin e marrjes së titullit, z. Nallbati, mes emocionesh, u shpreh: “Ky nderim nuk është vetëm një vlerësim personal për mua, por mbi të gjitha një mirënjohje për skuadrën e Policisë Kriminale dhe për bashkëpunimin e veçantë ndërmjet strukturave të Policisë së Shtetit dhe atyre të Policisë italiane. Një bashkëpunim i ndërtuar mbi besim, profesionalizëm, sinqeritet dhe përkushtim të ndërsjellë, që është konkretizuar me veprimtari të përbashkëta në terren dhe me përballje me sfida të përbashkëta. Faleminderit nga zemra, Presidentit të Italisë, për këtë vlerësim, si dhe faleminderit Drejtorit të Përgjithshëm, për mbështetjen në forcimin e bashkëpunimit mes dy policive. Një falënderim i veçantë i shkon dhe familjes sime, që ka përballuar me durim dhe sakrificë gjithçka që sjell jeta si oficer policie.”
Ndërkaq, z. Dautaj, gjithashtu i emocionuar, tha: “Ky titull vjen si finalizim i një marrëdhënieje të shkëlqyer, të ndërtuar ndër vite në fushën e sigurisë dhe në luftën kundër terrorizmit. Një falënderim i veçantë i shkon Zyrës së Interforcës së Ambasadës Italiane, të kryesuar nga miku im i veçantë, z. Gava, për bashkëpunimin e shkëlqyer në shkëmbimin e shpejtë të informacionit, realizimin e operacioneve të përbashkëta dhe funksionimin shembullor të grupit operacional “Skënderbeg”, tashmë një histori suksesi. Një falënderim shkon dhe për Drejtorin e Përgjithshëm, për mbështetjen, vlerësimin dhe motivimin që na jep për përmbushjen e misionit.”
Policia e Shtetit mbetet maksimalisht e angazhuar, për të vijuar bashkëpunimin solid dhe shumëdimensional me partnerët italianë, për përmbushjen e objektivave madhorë, goditjen e krimit të organizuar, kapjen e shtetasve të shpallur në kërkim dhe garantimin e sigurisë së qytetarëve të të dyja vendeve.
