Atentat në Shkodër me dy viktima dhe dy të plagosur / zbadhet vendimi që liroi nga burgu vrasësin

Mëngjesin e së hënës, rreth orës 08:50, në një lokal pranë Bashkisë së Shkodrës ndodhi një atentat me armë zjarri që la pas dy viktima dhe dy të plagosur. Ngjarja tronditi qytetin verior.

Në vendngjarje mbeti i vrarë Armando Pali, ish-anëtar i Këshillit Bashkiak dhe ish-punonjës i Inspektoratit të Mbrojtjes së Territorit. Viktima e dytë, Liridon Kraja (Lushi), 31 vjeç, truproja i një prej atyre të pranishëm, ndërroi jetë më vonë në spital si pasojë e plagëve të marra.

Midis të plagosurve janë:

Erogen Vaso (Brajoviç), 43 vjeç, i cilësuar si shënjestra e atentatit, aktualisht nën kujdesin e mjekëve;
Meri Kaceri, 25 vjeçare, kamarierja e lokalit, e cila pësoi plagë të lehta dhe është jashtë rrezikut për jetën.

Autori i dyshuar i ngjarjes është Ragip (ose Rakip) Gila, 29 vjeç, i cili u arrestua menjëherë pas atentatit gjatë një ndjekjeje që përfundoi me aksident në dalje të qytetit. Policia sekuestroi edhe armën e krimit, një automatik.

Hetuesit po shqyrtojnë pistat për motivin pas sulmit, duke përfshirë edhe mundësinë e hakmarrjes, veçanërisht duke marrë parasysh lidhjet e mundshme të të plagosurit Erogen Vaso me grupin e Bajrave.

WebLajm.com ka siguruar vendimin e lirimit të Gilës pak muaj pas arrestimit. Pasi u dënua me 5 vite dhe iu ul në 4, drejtësia vendosi ta rikthejë atë mes qytetarëve duke i pezulluar burgun.

Deklarimin fajtor të të pandehurit Ragip Jonuz Gila për kryerjen e veprës penale të prodhimit dhe shitjes së narkotikëve, parashikuar nga neni 283, paragrafi i parë i Kodit Penal.
Në bazë të kësaj dispozite, dënimin e tij me 5 (pesë) vjet burgim.
Në zbatim të nenit 406 të KPP, dënimi prej 5 vjetësh i ulet me 1/3, duke e dënuar përfundimisht me 3 (tre) vjet e 4 (katër) muaj burgim.
Në zbatim të nenit 59 të KP urdhërohet:
- pezullimi i ekzekutimit të dënimit me burgim;
- vënia në provë e të pandehurit Ragip Jonuz Gila për një periudhë prej 5 (pesë) vjetësh, me kusht që gjatë kësaj kohe të mos kryejë vepër tjetër penale;
- gjatë kësaj kohe prove, i pandehuri duhet të mbajë kontakte me Degën Territoriale të Shërbimit të Provës Shkodër.
Në zbatim të nenit 30 pika 2 të KP, urdhërohet që i pandehuri Ragip Jonuz Gila të mos thyejë masën, të mos zotërojë, mbajë apo përdorë armë.
Në referim të nenit 261/l/b dhe 389 të KPP, deklarohet shuarja e masës së sigurimit ndaj të pandehurit Ragip Jonuz Gila dhe urdhërohet lirimi i menjëhershëm i tij nga dhomat e paraburgimit, nëse nuk mbahet për ndonjë arsye tjetër.
Një kopje e këtij vendimi, pasi të marrë formë të prerë, i dërgohet Prokurorisë pranë Gjykatës së Shkallës së Parë Shkodër dhe Degës së Shërbimit të Provës për kontroll dhe verifikim.
Shpenzimet procedurale gjatë hetimeve dhe ato gjyqësore mbulohen nga shteti.
Kundër këtij vendimi mund të bëhet ankim në Gjykatën e Apelit të Juridiksionit të Përgjithshëm brenda 15 ditëve nga nesër pas shpalljes.