WASHINGTON D.C. & NASHVILLE – TENNESSEE – Drejtuesi i Strukturës së Posaçme Kundër Korrupsionit dhe Krimit të Organizuar (SPAK), z. Altin Dumani, zhvilloi një seri takimesh të nivelit të lartë në Shtetet e Bashkuara, duke theksuar rëndësinë e bashkëpunimit ndërkombëtar në luftën kundër krimit të organizuar dhe trafikut të paligjshëm të narkotikëve.
Më 2 dhe 3 shtator, z. Dumani u takua me zyrtarë të Departamentit të Shtetit, Departamentit të Drejtësisë dhe Byrosë Federale të Hetimit (FBI) në Washington D.C. Në këto takime u diskutua mbi nevojën për një koordinim të ngushtë midis SPAK dhe agjencive ligjzbatuese amerikane për goditjen e organizatave kriminale ndërkombëtare dhe parandalimin e pastrimit të parave dhe trafikut të narkotikëve. Z. Dumani shprehu mirënjohjen për mbështetjen e vazhdueshme të Shteteve të Bashkuara dhe theksoi rëndësinë e partneritetit strategjik midis dy vendeve.
Në periudhën 26-28 gusht, z. Dumani mori pjesë në Konferencën Ndërkombëtare për Zbatimin e Ligjit për Narkotikët, të organizuar nga Agjencia Amerikane Kundër Narkotikëve (DEA) në Nashville, Tennessee. Konferenca, me temën “Uniteti global për një të ardhme më të sigurt: Forcimi i aleancave kundër krimit transnacional”, u përshëndet nga Prokurorja e Përgjithshme e Shteteve të Bashkuara, znj. Pamela J. Bondi.
Gjatë konferencës, z. Dumani u takua me administratorin e DEA-s, z. Terrance Cole, ku u vlerësua bashkëpunimi ekzistues në luftën kundër trafikut ndërkombëtar të narkotikëve dhe u diskutua zgjerimi i tij në të ardhmen. Ai zhvilloi gjithashtu takime me drejtues të agjencive të tjera ligjzbatuese nga vendet pjesëmarrëse, duke diskutuar krijimin e urave të komunikimit dhe forcimin e marrëdhënieve ekzistuese për një koordinim më efektiv në luftën kundër krimit transnacional.
