Gjykata Kushtetuese vendosi sot njëzëri të kalojë në seancë plenare publike çështjen e ngritur nga kërkuesi Erion Veliaj, lidhur me dekretin e Presidentit të Republikës për caktimin e datës së zgjedhjeve për Bashkinë Tiranë. Në të njëjtën kohë, Gjykata ka vendosur të pezullojë përkohësisht pjesën e dekretit që përcakton datën e zgjedhjeve, deri në shqyrtimin e plotë të çështjes në seancë publike, e cila do të mbahet më 31 Tetor 2025.
Çështja vjen në një kohë kur klima politike në vend është e tensionuar për shkak të debateve mbi procesin zgjedhor dhe mandatin e kryebashkiakut të Tiranës, Erion Veliaj. Kjo pas shkarkimit të tij nga Këshilli Bashkiak dhe Qeveria.
Mirëpo, Veliaj ka kundërshtuar ligjshmërinë e këtij dekreti, duke argumentuar se shkarkimi e tij nuk ka hyrë në fuqi apo nuk është përfundimtare, dhe për këtë arsye, nuk ekziston vakancë që të justifikojë thirrjen e zgjedhjeve të reja. Përmes një padie në Gjykatën Kushtetuese, ai kërkoi pezullimin e dekretit dhe shqyrtimin e çështjes në themel.
Gjykata Kushtetuese, pas shqyrtimit të kërkesës, vendosi unanimisht të pranojë pezullimin e pjesshëm të dekretit dhe të kalojë çështjen në seancë plenare, ku do të dëgjohen palët dhe do të trajtohen aspektet juridike dhe kushtetuese të situatës. Kjo është një lëvizje e rëndësishme që mund të ketë pasoja të mëdha për ecurinë e procesit zgjedhor në kryeqytet dhe për klimën politike në vend.
Pasojat e mundshme
Nëse Gjykata vendos të shpallë të pavlefshëm dekretin e Presidentit, kjo mund të nënkuptojë se nuk do të ketë zgjedhje të reja në Tiranë deri në përfundimin formal të mandatit aktual ose deri në një zhvillim të qartë juridik që konfirmon vakancën. Në të kundërt, nëse Gjykata e konsideron dekretin të ligjshëm, atëherë procesi zgjedhor në kryeqytet mund të rifillojë menjëherë pas vendimit.
Zhvillimet priten me interes të madh nga të gjitha palët politike, ndërkohë që gara për Tiranën konsiderohet si një test i rëndësishëm për forcat politike para zgjedhjeve parlamentare të vitit 2025. Seanca publike e 31 Tetorit pritet të ndriçojë më shumë mbi balancën midis kompetencave të Presidentit dhe zhvillimeve politike në nivel vendor.
Ky vendim i Kushtetueses u arrit me një vendimarrje 9 me 0 nga Trupa gjykuese. WebLajm.com mëson se zgjedhjet në 5 Bashkitë e tjera, Vlorë, Tepelenë, Berat, Cerrik, Burrel do të vijojnë normalisht.
Njoftim për shtyp
Mbledhja e Gjyqtarëve të Gjykatës Kushtetuese të Republikës së Shqipërisë, sot në datën 09.10.2025 pasi mori në shqyrtim paraprak kërkesën e paraqitur nga kërkuesi Erion Veliaj me objekt: “Shfuqizimi i vendimit të Këshillit të Ministrave nr. 539, datë 25.09.2025 “Për shkarkimin nga detyra të kryetarit të Bashkisë Tiranë, z. Erion Veliaj”, si i papajtueshëm me Kushtetutën. Shfuqizimi i dekretit të Presidentit të Republikës nr. 350, datë 01.10.2025 “Për caktimin e datës së zgjedhjeve të pjesshme vendore për kryetar bashkie, për disa njësi të qeverisjes vendore” për pjesën që cakton datën e zgjedhjeve vendore në Bashkinë Tiranë, si të papajtueshëm me nenin 115, pika 2 dhe 3 të Kushtetutës. Pezullimi i efekteve juridike të dekretit të Presidentit të Republikës nr. 350, datë 01.10.2025 “Për caktimin e datës së zgjedhjeve të pjesshme vendore për kryetar bashkie, për disa njësi të qeverisjes vendore” për pjesën që cakton datën e zgjedhjeve vendore në Bashkinë Tiranë në zbatim të efekteve pezulluese që paragrafi 2 dhe 3 i nenit 115 i Kushtetutës parashikon, deri në marrjen e vendimit nga Gjykata Kushtetuese.”, bazuar në nenin 45 të ligjit nr. 8577, datë 10.02.2000 “Për organizimin dhe funksionimin e Gjykatës Kushtetuese të Republikës së Shqipërisë”, të ndryshuar dhe nenin 27 të Rregullores për Procedurat Gjyqësore të Gjykatës,
Pezullimin e dekretit të Presidentit të Republikës së Shqipërisë nr. 350, datë 01.10.2025 “Për caktimin e datës së zgjedhjeve të pjesshme vendore për kryetar bashkie, për disa njësi të qeverisjes vendore” për pjesën që cakton datën e zgjedhjeve vendore në Bashkinë Tiranë.
