SPAK vë nën Akuzë Ballukun / Rrezikojnë edhe disa zyrtarë publik. Dosja drejt Gjykatës. PAMJET

SPAK ka marrë zyrtarisht të pandehur zëvendëskryeministren dhe ministren e Infrastrukturës, Belinda Balluku, në lidhje me hetimin për tenderin e ndërtimit të tunelit të Llogarasë. Prokuroria e Posaçme dyshon se gjatë procesit të prokurimit janë kryer shkelje të rënda që kanë cenuar konkurrencën dhe barazinë mes operatorëve ekonomikë.

Hetimet kanë zbuluar se tenderi, me një vlerë fillestare prej rreth 140 milionë euro, është anuluar dhe rihapur disa herë, ndërsa kontrata përfundimisht iu dha një konsorciumi të huaj me ofertë më të lartë se ajo e një kompanie shqiptare. Kjo ka ngritur dyshime për favorizim dhe abuzim me procedurat ligjore, çka ka çuar në zgjerimin e hetimeve edhe ndaj disa zyrtarëve të tjerë të Ministrisë së Infrastrukturës dhe ARRSH-së.

Balluku ka mohuar çdo përfshirje të paligjshme, duke deklaruar se të gjitha procedurat janë zhvilluar në përputhje me ligjin dhe nën mbikëqyrjen e institucioneve përkatëse. Megjithatë, SPAK pritet të dërgojë çështjen në gjykatë brenda javëve së ardhshme. Ky hetim ndiqet nga prokurori Dritan Prençi, ndërsa weblajm.com mëson se janë deri më tani 7 persona të dyshuar pjesë e këtij hetimi.

Njoftimi Zyrtar i SPAK

SPAK njofton akuzën për veprën penale, “Shkelje e barazisë së pjesëmarrësve në tendera apo ankande publike”

Prokuroria e Posaçme kundër Korrupsionit dhe Krimit të Organizuar po heton në kuadër të procedimit penal nr.136 të vitit 2025 (bashkuar me procedimet penale nr.167 dhe 181 të vitit 2024), për veprën penale,“Shkelje e barazisë së pjesëmarrësve në tendera apo ankande publike”, parashikuar nga neni 258 i Kodit Penal.
Në kuadër të hetimit të këtij procedimi penal, sot, më 31.10.2025 i është njoftuar akuza të pandehurës Belinda Balluku, me funksionin e lartë shtetëror, Ministër i Ministrisë së Infrastrukturës dhe Energjisë, akuzuar për kryerjen e veprës penale,“Shkelje e barazisë së pjesëmarrësve në tendera apo ankande publike”, në bashkëpunim, parashikuar nga nenet, 258/2 dhe 25 i Kodit Penal.
Deri në këtë fazë të hetimeve paraprake, faktet penale, objekt akuze në ngarkim të të pandehurës Belinda Balluku, kanë të bëjnë me veprimet e saj, në cilësinë e Ministrit të Ministrisë së Infrastrukturës dhe Energjisë, për njërën nga procedurat e prokurimit, objekt i këtij hetimi, “Ndërtimi i tunelit të Llogarasë”, në seksionin rrugor Orikum-Himarë, pjesë e autostradës SH8 (Vlorë-Sarandë), zhvilluar në datën 11.12.2020 dhe pas anulimit të saj, procedura është rihapur në datën 22.6.2021, me fond limit, 18 967 810 952.08 (tetëmbëdhjetë miliardë e nëntëqind e gjashtëdhjetë e shtatë milionë e tetëqind e dhjetë mijë e nëntëqind e pesëdhjetë e dy (pikë) zero tetë) lekë pa TVSH. 
Më 21.10.2025, Prokuroria e Posaçme, si organ procedues ka njoftuar të pandehurën përmes shkresës me numër protokolli 37398. E pandehura, pasi mori dijeni, ka njoftuar më 23.10.2025, organin procedues se nuk mund të paraqitej në datën dhe orën e caktuar. Me anë të një shkrese tjetër, me numër protokolli 37881, datë 24.10.2025, Prokuroria e Posaçme kërkoi paraqitjen e saj sot, më 31 tetor, në orën 15:00.

Kodi penal për veprat që u hetua Balluku

Marzhi dënimeve parashikuar nga Kodi Penal sipas nenenve të vendosura nga SPAK 258/2 dhe 25

⚖️ Neni 258 – Shkelja e barazisë së pjesëmarrësve në tendera apo ankande publike

Pika 1:
Kryerja e veprimeve ose moskryerja e tyre, në kundërshtim me ligjin, nga personi që ka detyrë të përgatisë apo të zbatojë procedurat e tenderit ose të ankandit publik, me qëllim që t’i japë përparësi apo avantazh të padrejtë pjesëmarrësve të caktuar në këto procedura, dënohet me burgim nga një (1) deri në pesë (5) vjet.

Pika 2 (Neni 258/2):
Kur kjo vepër kryhet në bashkëpunim ose ka pasoja të rënda, dënohet me burgim nga tre (3) deri në shtatë (7) vjet.

– 258/1 → shkelje e barazisë në tendera → 1–5 vjet burg
– 258/2 → e njëjta vepër, por në bashkëpunim ose me pasoja të rënda → 3–7 vjet burg

⚙️ Neni 25 i Kodit Penal – Bashkëpunimi në kryerjen e veprës penale

“Kur vepra penale kryhet në bashkëpunim nga dy ose më shumë persona, secili prej tyre përgjigjet sipas rolit dhe fajit që ka pasur në kryerjen e veprës dhe në kufijtë e dënimit të parashikuar për veprën përkatëse.”

Në praktikë:

• “Në bashkëpunim” do të thotë që dy ose më shumë persona kanë vepruar së bashku me dijeni dhe qëllim të përbashkët për të kryer shkeljen.
• Secili dënohet brenda kufijve të dënimit të nenit bazë (në këtë rast 258/2), por gjykata merr parasysh rolet individuale (organizator, ekzekutues, ndihmës, nxitës).