Erion Alibej, i njohur me nofkën “Krymi”, ka dhënë dëshmi të zgjeruar përpara Gjykatës së Posaçme (GJKKO), duke treguar detaje për përfshirjen e tij dhe të vëllait në trafikun e kokainës, përplasjet mes grupeve kriminale në Elbasan, përdorimin e aplikacioneve të koduara dhe takimet me figura të rëndësishme si Nuredin Dumani, Hajdar Çopja dhe Suel Çela.
Deklaratat e Alibejt para trupit gjykues:
“Betohem që do them të vërtetën. Kam arsim të lartë. Kam qenë i dënuar në Itali, por në Shqipëri, në dëshminë e penalitetit, rezultoj i pastër.”
“Më 29 dhjetor të vitit 2018 ndodhi një atentat që ne si familje e quajmë kamikaz… (këtu ndërhynë avokatët e të pandehurve të tjerë).”
Takimi me Nuredin Dumanin dhe kontaktet me grupet kriminale
“Me Nuredinin jam njohur pasi u lirova nga paraburgimi i Elbasanit, në fillim të vitit 2020. Arjan Spahiu kishte kontakt me të nëpërmjet një ‘Fati’. Unë përdorja EncroChat dhe Sky ECC. Arjani më tha që Nuredini kishte kërkuar vetë të më takonte, sepse kisha përhapur fjalë në rrugë se për Talo Çelën jepja 100 mijë euro për ta vrarë dhe 200 mijë euro kush ma sillte të gjallë. Kjo gjë i kishte shkuar në vesh.”
“Bëra kërkime për Nuredinin dhe kisha çdo informacion për të. Erdhi te pallati në një banesë me qira që kisha marrë për djemtë e dajës. Qëndroi aty për 2 orë e 48 minuta. E regjistrova bisedën me të. Më tha që kishte dëgjuar se kërkoja Talo Çelën dhe se për këtë ishin në dijeni edhe Festim Qoli.”
“Unë i nisa bisedën duke i shpjeguar kush ishin ekzekutorët e familjarëve të mi. I tregova itinerarin e makinës që ishte qëlluar nga të dyja anët. Më tha që ka qenë edhe Dorjan Shkoza me një makinë tjetër, kishte zbritur dhe kishte qëlluar nga ana tjetër.”
“Nuredini më tha se kishte hall nga Dorjani, sepse ky po e ndiqte bashkë me dashnoren që ta ekzekutonte. Më tha se kishte probleme personale me ta. Unë i thashë që më interesonte vetëm Talo Cela. E dija që financuesit dhe urdhëruesit ishin në Dubai – vëllezërit Çopja, miq të hershëm të tanët.”
“Kur pashë që Nuredini nuk kishte telefon të enkriptuar, i thashë Arjanit që ai nuk kishte Sky ECC. I dhashë një iPhone 6 që kishte të instaluar Sky ECC, bashkë me 50 mijë euro, dhe i tregova si përdorej.”
E kaluara ime dhe përfshirja në trafik ndërkombëtar
“Vij nga një familje ku babai na la të vegjël pasi vdiq. Jemi një familje e respektuar në qytet. Vëllai emigroi në Greqi dhe pastaj në Itali. Nga viti 2006 deri në 2018 ishte marrë me trafik droge. Unë nuk u përziva, kujdesesha për familjen sepse kisha nënën e sëmurë.”
“Endriti ishte marrë gjithmonë me drogë. Në 2009 shkoi në Holandë. Në 2010 unë shkova në Itali për të marrë ilaçe për dy javë. Italia e kërkonte Endritin dhe më arrestuan mua, më dënuan me 3 vjet e 4 muaj sikur isha pjesë e grupit, edhe pse s’kisha lidhje.”
“Pasi u lirova në 2012, Endriti ishte sërish në Holandë dhe më dërgoi një vajzë që më mori. Shkova në Rotterdam. E gjeta me Hajdar Çopën. Endriti kishte shumë lidhje edhe në Holandë. Të gjithë donin të punonin me të.”
“Kam pasur shoqëri me Suel Çelën, Hajdar Çopën e njihja familjarisht. Elbasani është i vogël, njihemi që fëmijë.”
Konfliktet me Suel Çelën dhe Çopjat
“Endriti kishte bazë edhe në Angli. Nuk flisja me Suelin për një hatërmbetje për shkak të Arjan Spahiut dhe trafikut të drogës. Një ditë më tha Endriti që do vinte Sueli me Sokol Sanxhaktarin. Nuk doja t’i takoj. Sueli kishte filluar herët trafikun në Itali dhe ishte arrestuar.”
“Në Itali, Sueli i kishte vjedhur Hajdar Çopës 2 kg kokainë. Shoqërohej me Klodian Çopën, kushëri i dytë i Hajdarit. E ndihmova Suelin kur ishte në arrest shtëpie. Arjan Spahiu shkoi e mori, hyri nga Franca dhe e nxori. Sueli i kishte borxh për gjysmë kile kokainë dhe unë dola garant për këtë gjë.”
Anglia dhe grupet shqiptare atje
“U ktheva në Angli për të punuar që të ndihmoja Endritin të shlyente borxhet. Shkova me kamion, ndenja te xhaxhai Arben Dylgjeri. Më pas mora një shtëpi nga një agjenci dhe nisa punën me kokainën. Arrita të laja një borxh shumë të madh që kishte Endriti. Puna u rrit aq shumë sa ra në sy dhe përmendej emri im.”
“Në Angli bashkëpunova fillimisht me një Ylli nga Rrogozhina dhe Klodin nga Durrësi. Më pas erdhi Ilir Lloshi që organizonte punën për Hajdar dhe Franc Çopën. Më tha që kishte ndodhur një problem me transportin e kuajve dhe se një ngarkesë ishte kapur.”
“Bëra dokumente greke false me ndihmën e Çopjave, me emrin Kristadhio, dhe vazhdova punën me shitjen e kokainës në Angli.”
“Dua të sqaroj se nuk është e vërtetë që lufta nisi për një ngarkesë prej 50 kg kokainë. Ilir Lloshi më çoi një mesazh që donte të më takonte. Kur e takova, ishte me sy të nxirë, më tha se kishte shpëtuar nga duart e anglezëve dhe se një ngarkesë e madhe e Francit ishte grabitur.”
Përplasjet me Çapjat dhe dhuna në Elbasan
“Në qytet nisën fjalë sikur Sueli kishte shtyrë dikë të plagoste dajën tim. Sueli ishte gjithmonë i përfshirë në aktivitete kriminale, edhe përtej drogës. Në këtë periudhë kishte përplasje me grupin Çapja: Ardian, Florenc dhe Bledar Muçën.”
“Kur u ktheva në Shqipëri, ndodhi një incident tek lokali i dajës. Sueli, babai i tij dhe Sokol Sanxhaktari kaluan me Range Rover. Sueli hapi xhamin dhe i tha Endritit ‘Hajde pak te tregu’. I thashë Suelit ‘S’ke turp që drejton gishtin?’ Doli Sokol Sanxhaktari dhe më tha: ‘O Erion, çfarë po flet?'”
“Në shtëpinë e Suelit, ku ishte edhe nëna e tij, u diskutua një problem me një ngarkesë që pretendohej se ishte grabitur nga disa rumunë të lidhur me Hajdar Çopën. Ata e mohonin dhe dyshonin se kishte lidhje Endriti. Ai qeshi ironikisht dhe tha: ‘S’kam lidhje me këtë punë.'”
“Më vonë shkova dhe takova nënën e Suelit, Hanën. Ajo u përlot dhe më përqafoi. Nuk kisha shkuar më në shtëpinë e tyre që kur Sueli ishte burgosur në Itali.”
