Policia Bashkiake ka lëshuar sot një ultimatum të prerë ndaj të gjitha subjekteve që kanë zënë hapësira publike, kryesisht kioskat që shfrytëzojnë trotuaret me frigoriferë apo struktura të tjera të paligjshme.
Në një njoftim zyrtar, autoritetet vendore bëjnë të ditur se:
“Të gjitha subjektet që kanë zënë hapësirat publike me frigoriferë, duhet të bëjnë lirimin e menjëhershëm dhe vullnetar të këtyre hapësirave.”
Ky reagim vjen pas një fushate intensive dhe inspektimesh të përsëritura në terren. Policia Bashkiake thekson se subjektet janë paralajmëruar disa herë, përfshirë edhe gjatë ditës së djeshme, por shumë prej tyre kanë zgjedhur të injorojnë thirrjet për zbatim të ligjit.
⚠️ Autoritetet paralajmërojnë se në rast moszbatimi do të ndërhyjnë me masa ndëshkimore, pa asnjë paralajmërim të mëtejshëm.
“Zbatimi i ligjit është i panegociueshëm,” – thuhet në deklaratën për shtyp.
Kjo lëvizje është pjesë e një aksioni më të gjerë për lirimin e hapësirave publike dhe rikthimin e tyre në funksion të qytetarëve, duke rritur cilësinë e jetës urbane dhe disiplinuar shfrytëzimin e paligjshëm të pronës publike.
