Pas rikthimit në detyrë me vendim të Gjykatës Kushtetuese, kryetari i Bashkisë së Tiranës, Erion Veliaj, ka reaguar për herë të parë publikisht përmes një mesazhi të shpërndarë nga avokatët e tij.
Në reagimin e tij, Veliaj thekson se vendimi i Gjykatës Kushtetuese nuk është një fitore personale, por një rikthim i mandatit “tek ata që u përket – qytetarëve të Tiranës”.
“Vendimi i Gjykatës Kushtetuese nuk ishte një vendim për të më kthyer mandatin mua, por për t’ua kthyer atyre që ju përket, popullit të Tiranës. Ky nuk është një vendim për një njeri, por për demokracinë shqiptare, për votën e lirë dhe për çdo qytetar që beson se pushteti buron nga populli dhe i përket atij,” – shkruan Veliaj.
Kryebashkiaku falënderon qytetarët e kryeqytetit për mbështetjen dhe durimin gjatë periudhës kur ai ishte pezulluar nga detyra, duke theksuar se “e drejta mund të vonojë, por nuk harron”.
“Gjykata Kushtetuese rivendosi jo thjesht një mandat, por dinjitetin e ligjit dhe besimin se shteti ka ende busull. Faleminderit çdo qytetari të Tiranës që besoi, që priti dhe që nuk u dorëzua,” – shton ai.
Në fund të reagimit, Veliaj premton se do të vijojë punën në drejtimin e Bashkisë së Tiranës pa u ndalur dhe pa u penguar në ushtrimin e mandatit që i është besuar nga qytetarët.
“Unë do të bëj çdo gjë që është në dorën time, që puna të vijojë, dhe do të kërkoj pa u ndalur që të mos pengohem në ushtrimin e mandatit që më keni besuar. Tirana nuk ndalet. Ju dua shumë!” – përmbyll ai mesazhin.
Vendimi i Gjykatës Kushtetuese, i shpallur pak ditë më parë, rivendosi në detyrë Erion Veliajn, duke rrëzuar pezullimin e tij të mëparshëm dhe duke konsideruar shkelje kompetencash në procedurat që çuan në largimin e tij.
Ky vendim shënon një kthesë të rëndësishme në debatin politik e institucional të javëve të fundit dhe i hap rrugën rikthimit të plotë të Veliajt në drejtimin e kryeqytetit.
