BE propozon “Schengen ushtarak” – Plani synon të përshpejtojë lëvizshmërinë ushtarake brenda bllokut. Shtetet anëtare të BE-së do të kenë vetëm tre ditë në kohë paqeje dhe gjashtë orë në raste emergjence për të lejuar trupat dhe pajisjet ushtarake evropiane të kalojnë kufijtë e tyre, sipas një propozimi të ri të Komisionit Evropian për një “Schengen ushtarak”. Plani synon të përmirësojë ndjeshëm lëvizshmërinë ushtarake brenda bllokut.
“Sot, për të lëvizur pajisje dhe trupa ushtarake nga perëndimi në lindje, fatkeqësisht kërkon muaj. Ne duam që kjo të ndodhë brenda disa ditësh,” tha një përfaqësues i lartë i bllokut.
“Nuk mund të mbrosh një kontinent nëse nuk mund të lëvizësh lehtësisht në të. Kështu që ne po krijojmë këtë Schengen ushtarak,” shtoi ai.
Paketa e quajtur “Lëvizshmëria Ushtarake” është plani më i fundit i Komisionit Evropian për të forcuar ndjeshëm mbrojtjen e BE-së para fundit të dekadës. Deri atëherë, disa agjenci inteligjence besojnë se Rusia mund të ketë kapacitetin për të sulmuar një tjetër vend evropian.
Një nga masat kryesore do të jetë përshpejtimi i lejeve për lëvizjen ushtarake ndërkufitare. Aktualisht, rregullat në 27 shtetet anëtare nuk janë të harmonizuara. Disa prej tyre kërkojnë javë për t’u përgjigjur ndaj një kërkese nga një vend tjetër i BE-së për të lëvizur trupa ose pajisje në territorin e tyre.
Komisioni synon që kjo të reduktohet në maksimumi tre ditë në kohë paqeje dhe vetëm gjashtë orë në kohë emergjence, me supozimin se në këtë rast do të jepet leja automatikisht. Plani parashikon një sistem të ri reagimi për lëvizshmërinë ushtarake evropiane, të modeluar sipas Mekanizmit të Mbrojtjes Civile, që lejon shtetet anëtare të sigurojnë shpejt ndihma kur përballen me katastrofa natyrore ose të shkaktuara nga njeriu.
Ky sistem do të përfshijë një “fond solidariteti për mobilitetin ushtarak”, ku anëtarët do të mund të lirojnë burime, si trena, tragete apo transport ajror strategjik, në shërbim të vendeve të tjera. Gjithashtu, do të krijohet një “katalog”, ku do të listohen burimet transportuese dhe logjistike me përdorim të dyfishtë nga kompanitë civile, që mund të përdoren për operacione ushtarake.
Marrë nga ScanTv
