Pas mbylljes së fazës së grupeve dhe përfundimit të ndeshjeve kualifikuese, ku Shqipëria siguroi vendin në “play-off” falë paraqitjeve solide gjatë ciklit, sot u hodh edhe shorti vendimtar që përcakton rrugën drejt Botërorit 2026. Shorti europian, i cili do të luhet më 26 dhe 31 mars 2026, solli përballje të forta dhe të balancuara për ekipet që mbeten në garë.
Goglat rezervuan Poloninë si rivale të Shqipërisë, duke vendosur kuqezinjtë përballë një kundërshtari të vështirë në gjysmëfinalen e 26 marsit, e cila do të luhet në transfertë. Ky duel vjen pas një rrugëtimi të gjatë kualifikues, ku Shqipëria tregoi karakter dhe vazhdimësi, duke e çuar çështjen e kualifikimit deri në fazën vendimtare.
Nëse kuqezinjtë ia dalin t’i mposhtin polakët, atëherë në finalen e 31 marsit do të përballen me fituesin e çiftit Ukrainë–Suedi, një sfidë po ashtu e fortë dhe përcaktuese për biletën e madhe drejt Kupës së Botës.
Ndërkohë, edhe Kosova ka mësuar rrugëtimin e saj në këtë fazë. Për dardanët, shorti përzgjodhi Sllovakinë, po ashtu në transfertë. Nëse kombëtarja e Kosovës kalon me sukses këtë sfidë, rivali i finales së “play-off”-it do të jetë fituesi i çiftit Turqi–Rumani.
Me këtë short, marsi i vitit 2026 pritet të sjellë emocione të jashtëzakonshme për të dy kombëtaret shqiptare, të cilat do të luftojnë për një vend historik në Botëror.
