Një operacion i befasishëm i Policisë së Fierit, në bashkëpunim me Drejtorinë e Përgjithshme të Tatimeve dhe strukturat e hetimit financiar, ka çuar në arrestimin e dy drejtuesve të kompanisë së njohur naftënxjerrëse “Bankers Petroleum”.
Në pranga kanë rënë CEO aktual i kompanisë, shtetasi me kombësi kineze Hongping Xiao, si dhe ish-drejtuesi shqiptar Leonidha Çobo.
Të dy akuzohen për shkelje të rënda në fushën e menaxhimit financiar dhe dyshime për mashtrim tatimor në vlera të konsiderueshme.
Operacioni u zhvillua në orët e para të mëngjesit të sotëm në zyrat qendrore të “Bankers Petroleum” në Patos, ku forcat e policisë ndërhynë me forcë dhe sekuestruan dokumentacion të rëndësishëm financiar. Burime brenda grupit hetimor bëjnë me dije se aksioni është rezultat i një hetimi të thelluar disa-mujor, i mbështetur në të dhëna të siguruara nga auditime të brendshme dhe bashkëpunimi ndërinstitucional.
Gjykata ka caktuar gjithsej 14 masa sigurie, nga të cilat 6 janë me arrest në burg. Deri tani janë ekzekutuar vetëm dy prej tyre, ndërsa katër persona rezultojnë jashtë territorit të Shqipërisë.Në listën e të hetuarve përfshihen gjithashtu tre shtetas kinezë dhe një shtetas kanadez, të gjithë të lidhur me strukturën drejtuese të kompanisë gjatë viteve të fundit.
Vendimi i Gjykatës për caktimin e masave sigurie përmban një dosje voluminoze prej 200 faqesh, ku dokumentohen prova të shumta për transaksione të dyshimta, shmangie taksash dhe skema të mundshme mashtrimi financiar.Hetimet vijojnë në bashkëpunim edhe me autoritetet e huaja, në përpjekje për të lokalizuar dhe ekstraduar personat që ndodhen jashtë vendit.
Material i marrë nga Reporter / Edmond Hoxhaj
Reporter.al
Shefi ekzekutiv i Bankers Petroleum, kompanisë më të madhe të nxjerrjes së naftës në vend, Hongping Xiao dhe ish-drejtori i përgjithshëm, Leonidha Çobo u arrestuan të mërkurën me urdhër të Prokurorisë së Fierit me akuza për krijimin e një skeme mashtrimi me të ardhurat, pastrimin e produkteve të veprës penale si dhe shpërdorim detyre.
Ndërkohë, një drejtues i Policisë i tha BIRN se 4 urdhër arreste të tjera nuk janë ekzekutuar ende nga Policia, pasi personat e kërkuar janë shtetas të huaj dhe nuk ndodhen në Shqipëri.Operacioni i Policisë në zyrat e Bankers u filmua nga mediat lokale që u sinjalizuan për praninë e policisë aty. Drejtues të Prokurorisë së Fierit thanë se do të dalin me një njoftim për mediat, ndërsa një burim nga kjo prokurori konfirmoi vetëm akuzat për Xiao dhe Çobon.
Në hetimet për rastin është përfshirë edhe Drejtoria e Hetimit Tatimor.Bankers Petroleum është themeluar në vitin 2004 si një kompani e vogël e regjistruar në bursë, ndërsa ajo u fuqizua me shpejtësi përgjatë viteve në vijim pasi mori me koncesion shfrytëzimin e burimeve të naftës në Patos – Marinzë, e cila është burimi më i madh i prodhimit të naftës në Shqipëri.Kompania nënshkroi një kontratë koncesionare me qeverinë shqiptare në vitin 2004, në bazë të së cilës, fitonte të drejtën për të shfrytëzuar burimin e naftës Patos-Marinzë.
Kontrata koncesionare parashikonte që Bankers duhej të investonte për të rritur prodhimin e naftës dhe duhej t’i paguante qeverisë shqiptare 50 për qind normë fitimi pasi të shlyente investimet fillestare.Kjo nuk është hera e parë që autoritete e vendit hetojnë kompaninë Bankers Petroleum, të cilën e kanë akuzuar për mospagim të plotë të detyrimeve ndaj shtetit.
Agjencia Kombëtare e Burimeve Natyrore akuzoi Bankers në vitin 2012 për shmangie të pagesave ndaj shtetit përmes nënkontraktimeve të shtrenjta. Çështja u dërgua në arbitrazh dhe në verën e vitit që shkoi, Ministria e Infrastrukturës dhe Energjetikës njoftoi se shteti shqiptar kishte fituar padinë në arbitrazh.
