. Zbulohet vendimi, si u “rrëmbye” makina e shtetitDy dekada më parë me firmë të ish-kryepolicit të Vlorës, z. Haki Çako, Elton Kërluku, sot kreu i hetimeve financiare në Prokurorinë e Posaçme dhe kandidat për marrjen e drejtimit të Byrosë Kombëtare të Hetimit, është përjashtuar nga radhët e policisë.
Sipas vendimit të shkarkimit firmosur nga Çako, si polic dhe komandant i postës së Selenicës, Kërluku kishte kryer shkelje të rënda duke marrë pa leje mjetin e policisë dhe shkelur rregullat e qarkullimit rrugor e jo vetëm.
Por këtë urdhër e rrëzoi gjykata e shkallës së parë dhe ajo e apelit, deri sa policia bëri rekurs. Ishte gjykata e lartë, nën relatimin e Ardian Dvoranit, që la në fuqi përjashtimin e Kërlukut nga radhët e policisë duke e konsideruar atë si të papërshtatshëm dhe si efektiv që kishte thyer besimin duke mos respektuar urdhrat e eprorëve.
WebLajm.com sjell një kronologji të procesit gjyqësor, i cili daton 19 vite më parë me vendimarrjen e vitit 2006, ndërsa ngjarja daton 21 vite më parë në 2004.
Këtë të Enjte, 7 kandidatët në garë për kreun e BKH-së kaluan testin fizik, ndërsa pritet t’i nënshtrohen fazave të tjera. Mes tyre është eseja, intervista, poligrafi dhe vetting. Ndër kushtet për t’u bërë pjesë jo vetëm e BKH-së, por edhe e strukturave në varësi të SPAK, është të mos kesh masa disiplinore të përjashtimit apo shkarkimit nga një detyrë e mëparshme shtetërore.
Ajo që mbetet e paqartë nga ky vendim i gjykatës së lartë është nëse Kërluku e ka deklaruar në kontrollin e parë teksa ai u rekrutua si pjesë e hetimit financiar, apo nëse e ka deklaruar në dokumentacionin e dorëzuar për t’u bërë drejtues i BKH-së nëpërmjet garës që po vijon.
Ky proces po ndiqet nga Kreu i SPAK, z. Altin Dumani, Arben Kraja dhe Behar Dibra, ndërsa deri më tani janë skualifikuar 6 kandidatë nga 13 që aplikuan në fillim.
Gjykata e Lartë rrëzoi padinë e ish-punonjësit të Policisë së Shtetit, Elton Kërluku
Më 4 korrik 2006 — Kolegji Civil i Gjykatës së Lartë, i përbërë nga: Nikoleta Kita (Kryesuese), Artan Hoxha (Anëtar), Agron A. Lamaj (Anëtar), Ardian Dvorani (Anëtar), Shpresa Beçaj (Anëtare), ka vendosur rrëzimin e padisë së ish-komandantit të Postës së Policisë në Selenicë, Elton Kërluku, duke ndryshuar vendimet e mëparshme të Gjykatës së Shkallës së Parë dhe të Apelit, të cilat kishin anuluar urdhrin e përjashtimit të tij nga Policia e Shtetit dhe kishin urdhëruar kompensimin me një vit pagë.
Kërluku kishte paditur Drejtorinë e Përgjithshme të Policisë së Shtetit, duke kërkuar anulimin e urdhrit nr. 934/4, datë 11.10.2004, me të cilin ishte përjashtuar nga radhët e policisë për shkelje të betimit, sjellje të papërshtatshme dhe abuzim me atributet e detyrës.
Në vendimin përfundimtar të datës 04.07.2006, Gjykata e Lartë vlerësoi se:
“Veprimet e paditësit – përfshirë përdorimin pa leje të mjetit të Policisë, largimin nga vendi i shërbimit, shkeljen e hierarkisë dhe komunikimit me eprorët – përbëjnë në tërësinë e tyre shkelje të rënda disiplinore dhe një shkelje të betimit të bërë ndaj detyrës.”
Gjykata theksoi se për shkelje të tilla nuk është e nevojshme të ketë përsëritje apo gradim të masave disiplinore, duke vlerësuar si të ligjshëm përjashtimin e tij me urdhrin e dhënë nga Drejtoria e Përgjithshme e Policisë.
Kronologjia e Proçesit gjyqësor:
• 11.10.2004 – Lëshohet urdhri i përjashtimit nga Drejtoria e Policisë
• 18.05.2005 – Gjykata e Shkallës së Parë e pranon padinë (vendimi nr.3020)
• 06.09.2005 – Gjykata e Apelit lë në fuqi vendimin e parë (vendimi nr.829)
• 04.07.2006 – Gjykata e Lartë ndryshon vendimet e mëparshme dhe rrëzon padinë
Argumenti i Kolegjit: Kërluku përdori pa leje makinën e policisë, ndërpreu komunikimin me eprorët theu hirarkinë
Kolegji Civil i Gjykates se Larte cmon se shkaqet e parashtruara ne rekursin e anes se paditur jane te mbeshtetura ne ligj dhe vendimet e dhena nga te dy gjykatat duhet te ndryshohen dhe padia te rrezohet.
Gjykatat kane pranuar ne pergjithesi rrethanat mbi te cilat motivohej urdheri i te paditurit objekt ne kete gjykim. Keshtu rezulton se paditesi ka shkelur dispozitat ligjore dhe nenligjore ne fuqi lidhur me largimin nga vendbanimi dhe vendi i sherbimit, si dhe perdorimin e parregullt te mjeteve dhe teknikes te dhena ne perdorim per kryerjen e detyres. Keto shkelje jane shoqeruar edhe me parregullsi serioze deri ne nderprerje te komunikimit me struktura te tjera te policise dhe eproret e te paditurit. Ne kuptim te ligjit, ne rrethana te tilla, nuk jemi vetem perpara shkeljes lidhur me “perdorimin pa leje” jashte funksionit dhe destinacionit te automjetit te policise se shtetit. Keto shkelje rezulton te jene shoqeruar me shkelje te renda te ligjit lidhur me hierarkine e urdherit (neni 23), raportet e disiplines (neni 24), dinjitetin e punonjesit te policise (neni 26), qendrimin ndaj sherbimit (neni 53) dhe detyrimet ndaj sherbimit (neni 54) te Ligjit nr.8553, date 25.11.1999 “Per Policine e Shtetit”. Ne kuptim dhe zbatim te ligjit dhe Rregullores se Disiplines, disiplina eshte thelbesore per funksionimin e policies, ku respektimi i hierarkise, bindja menjehere dhe ne besnikeri ndaj urdherit te eprorit, respektimi i tyre eshte e detyrueshme per punonjesin e policise. Njekohesisht ne permbushjen e detyres, punonjesi i policise duhet te tregoje respekt dhe bindje profesionale ndaj dispozitave qe lidhen me kryerjen e detyres, si dhe te ruaje dinjitetin, nderin personal dhe te kete sjellje etike e ligjore ne detyre dhe jashte saj (Rregullorja e Disiplines).
